Германскиот тенисер Александер Зверев киксна во вчерашното финале против шпанската сензација Карлос Алкарас, по пораз му честиташе на спортскиот противник, но имаше и остра порака за АТП и управата на турнирот.
Имено, Зверев истакна дека немал соодветен третман иако во Мадрид пристигна како актуелен и двоен шампион.
„Карлос игра неверојатно и нема апсолутно никаков сомнеж во тоа. Тој игра неверојатно. Сепак, морам да кажам уште една работа. АТП ја заврши својата работа апсолутно срамно оваа недела. Пред два дена легнав во 4:00 или 4:30 часот наутро, а синоќа си легнав во 5:20. Знаете, ако нормална личност легнува една вечер во 4 часот, а следната во 5 часот, ќе ѝ биде многу тешко да се разбуди. воопшто. А мене ми беше навистина тешко да го играм финалето против Карлос, кој моментално за мене е најдобар играч на светот. Сега сум малку лут, би рекол, бидејќи немав координација во финалето“, изјави Зверев.
Германецот продолжи да ги критикува последиците од неговиот катастрофален ритам во шпанската престолнина.
„Немав координација во сервисот, односно во ударите. Промашив два удара кои беа премногу лесни бидејќи ја гледав топката, а сѐ ми се движеше пред очи. Не сакам ништо да му одземам на Карлос, бидејќи денес беше очигледно дека нема да го победам дури и да бев свеж, но дефинитивно ќе беше подобар натпревар. На крајот на денот мислам дека сите останаа до доцна, некои можеби се забавуваа до доцна, но ако останете будни до 4 часот наутро, следниот ден сте 'мртов'. А јас играв следниот ден. Ако го направите тоа повторно и останете до 5 часот следниот ден, тогаш ќе имате потешкотии да останете будни. Повторувам, не сакам ништо да му одземам, но искрено ми е жал за начинот на кој го одиграв финалето бидејќи ова можеше да биде многу добар натпревар“, изјави Зверев.
Да потсетиме, младиот Алкарас, кој во четвртокот го прослави својот 19-ти роденден, е победник на АТП Мастерс 1000 тенискиот турнир во Мадрид. Тој во финалето го совлада бранителот на титулата Зверев за само 1 час со 6:3 и 6:1.