Почнувајќи од 23 март, „пиратите“ ќе имаат една дестинација помалку за преземање „кракувани“ наслови.
Оние кои често пловат по дигиталното море под црно знаме сигурно налетале на GOG-Games, еден од најголемите сајтови за пиратско преземање игри. Сепак, овој сајт нема да биде достапен за јавноста долго време, бидејќи сопствениците на страницата најавија дека од 23 март 2024 година веќе нема да може да се пристапи до неа.
На страницата се појави порака со следнава содржина:
„Здраво на сите. По многу размислување, GOG-Games.to наскоро ќе стане приватна. Оваа порака ќе остане активна околу 12 часа, по што страницата ќе се врати во нормала. Конечно, на 23 март, страницата ќе стане приватна. Ви благодариме што го читате ова“.
Не дозволувајте името да ве залажува, GOG-Games не е исто што и GOG (целосно легална страница за дистрибуција на игри во сопственост на CD Projekt), туку е пиратска верзија на таа платформа. Всушност, GOG-Games е една од најголемите интернет дестинации за преземање „кракувани“ игри, која многу пирати ја сметаат за едно од најбезбедните решенија.
Не се познати причините за ваквата одлука, ниту што точно значи дека сајтот ќе стане „приватен“. Сепак, се претпоставува дека сопствениците во иднина ќе дозволуваат пристап само до донаторите, но останува да се види дали тоа навистина ќе се случи.
Потценување е да се каже дека овој месец не беше добар за љубителите на нелегални содржини. Да потсетиме, откако Nintendo успеа да ги исклучи емулаторите Yuzu и Citra, некои девелопери исто така подлегнаа на притисокот и превентивно ги затворија своите решенија за играње ретро игри на компјутери и телефони.