21 декември 1988, трагедијата над Локерби
Либиски терористи со бомба урнале Boeing 747-121 над шкотското гратче Локерби при што ги убиле сите 259 луѓе во авионот како и 11 локални жители.
Транслатлантскиот лет 103 на американската авиокомпанија Pan Am летал од Франкфурт за Детроит со попатно застанување во Лондон и Њујорк. Додека авионот бил над шкотското небо се активирала бомба што резултирало со трагичен исход. Сите 243 патници и 16 членови на екипажот загинале, а деловите кои паѓале од небото убиле и 11 жители на гратчето Локерби. Тоа е најсмртоносниот терористички напад извршен во Обединетото Кралство. Загинатите биле од 21 различна држава од кои најмногу од САД, вкупно 190, додека 43 од Обединетото Кралство.
По тригодишна истрага се востановило дека нападот бил испланиран од двајца Либијци кои тогашниот либиски претседател Моамер Гадафи во 1999 година ги предал на судење, а две години подоцна Гадафи им платил компензација на фамилиите на настраданите. Гадафи сѐ до својата смрт тврдел дека не стои зад нападот.
До денес не се разјаснети точните мотиви за нападот. Она што е најверојатно дека се случило е дека бомбата била подметната во Лондон, кога авионот слетал на „Хитроу“.