3 јануари 1925, Бенито Мусолини се прогласил за диктатор

На денешен ден, пред точно 100 години, италијанскиот фашистички лидер Бенито Мусолини одржал говор пред италијанскиот Парламент во кој го утврдил неговото право на врвна моќ и ефективно станал диктатор на Италија.

Пред да стане лидер на фашистичко движење, Мусолини бил новинар и посветен социјалист, но по Првата светска војна станал фашист и со тоа бил инспирација за Адолф Хитлер. До 1921 година Мусолини бил избран во Парламентот како лидер на растечката Национална фашистичка партија.

Во октомври 1922 година организирал марш во Рим на кој учествувале 60.000 фашисти. Кралот Виторио Емануеле III му дал мандат да состави влада на 28 октомври 1922 година со што Мусолини станал премиер. Тогаш почнала неговата фашистичка диктатура за која карактеристични биле империјалистичката политика, укинувањето на демократските слободи и права и страшниот терор.

На почетокот имал поддршка од пратениците од Либералната партија во Парламентот, со нивна помош вовел строга цензура и го изменил изборниот закон така што во периодот од 1925 година до 1926 успеал да ја придобие сета диктаторска моќ и да ги ликвидира другите политички партии.

Од заслепените следбеници Мусолини бил наречен Ил Дуче (Водачот). Постепено ја градел легендата за Ил Дуче како човек кој секогаш е во право и е способен да ги реши сите политички и економски проблеми. Благодарение на него Италија станала полициска држава.

На 28 април 1945 година бил фатен од италијанските партизани и застрелан по брза постапка.