На денешен ден се навршуваат 10 години од катастрофата во Фукушима, најголема по Чернобил. Силниот земјотрес од 9 степени и цунамито што следеше на 11 март 2011 година убија 20.000 луѓе и уништија електрана.
Минаа десет години откако радијацијата принуди илјадници луѓе да побегнат од нивните домови во Фукушима, а некои градови во тој регион и понатаму тешко се носат со прашањето како да го обноват животот во заедницата.
Пред 10 години светот сведочеше на силниот земјотрес проследен со цунами што ја погоди Јапонија при што се случи и најголемата катастрофа по Чернобил. Разорните бранови предизвикани од земјотресот со магнитуда од 9,0 степени го погодија североисточниот брег на земјата, убија скоро 20.000 луѓе и ја уништија нуклеарната електрана во Фукушима.
Повеќе од 160.000 луѓе побегаа поради радиоактивното зрачење. Постоеја стравувања дека ќе мора да биде евакуиран и Токио, но и други градови.
Кијоши Кукокава ја водеше истрагата од која крајниот заклучок е дека за катастрофата е виновен човечки фактор. Владата потроши скоро 300 милијарди долари за обнова на регионот Тохоко кој беше уништен од цунамито, додека подрачјата околу нуклеарката во Фукушима и понатаму се со тежок пристап.
Радијацијата предизвикува загриженост, а луѓето сакаат, но се двоумат да се вратат во родните места.
Во 12 проценти од префектурата Фукушима не е дозволен пристап по катастрофата. Повеќето подрачја се прогласени за безбедни по деталната деконтаминација и луѓето се поттикнуваат да се вратат, но засега тоа оди прилично тешко.
