Изминативе недела дена беше извршена акција за чистење на дел од Тихиот Океан при што беа извадени околу 11.500 килограми пластичен отпад, што претставува едно од најголемите чистења на океаните во историјата.
Компанијата The Ocean Cleanup е непрофитна организација специјализирана за чистење на океаните која располага со модерна технологија. При чистењето на дел од Тихиот Океан изминатава недела извлечени се 11.353 килограми пластичен отпад. Овој потфат се смета за едно од најголемите чистења на океаните во историјата.
Секоја година милиони тони пластика се фрла во океаните или таму пристигнува преку реките. Ако ништо не се преземе пластиката сѐ повеќе и повеќе ќе ги загадува нашите екосистеми, здравјето и економијата.
Основниот мотив за чистењето на океаните од пластика и друг отпад е здрава еколошка средина. Чистењето на океаните се состои од две фази.
Прво се собира пластика по различни одбрани делови на океанот, а потоа со специјална технологија се извлекува на брод за посебни намени. Покрај океаните, се чистат и речните текови бидејќи преку нив ѓубрето доаѓа до океаните.
Целта е пловечката пластика да се намали за 90% до 2040 година.
За чистење на мапираниот дел на Пацификот изминативе недела дена беше користен модерниот технолошки System 03.
Чистењето на океаните со System 03, кој наликува на вештачка брана што го запира отпадот, е многу поисплатливо од претходните два (System 02 и System 01), бидејќи машините можат да „грабнат“ многу повеќе килограми ѓубре. Со тоа и цената е поприфатлива.
„Пловечките конструкции на оваа брана можат да спречат отпад од различни димензии: од најситната пластика до големи рибарски мрежи кои веќе не се користат“, велат од холандската организација The Cleanup.
Планот за чистење имплементиран во 2022 година меѓу Калифорнија и Хаваи е наречен „Крајот на Големото пацифичко ѓубре“.
