Славниот аргентински фудбалер Серхио Агуеро објави крај на богатата кариера која ја заврши на тажен начин поради проблеми со срцето.
Агуеро во финишот на првото полувреме од натпреварот на Барселона против Алавес на 30 октомври почувствува проблеми со дишењето, по што му беше откриена срцева аритмија. Во неколку наврати нагласи дека ќе се врати, но не му успеа.
На прес-конференцијата плачеше неколку минути, со него плачеа и присутните соиграчи и пријатели.
„Оваа конференција е за да ви соопштам дека одлучив да ја завршам фудбалската кариера, одлучив да ја прекинам кариерата и ова е многу тежок момент за мене. Главна причина е моето здравје, бидејќи ми се случи проблем пред месец и половина. Пред 10 дена се одлучив на тоа. Сакам на сите да им кажам дека направив се за да ја продолжам кариерата, но ништо не можеше да се направи. Горд сум на постигнатото и на кариерата што ја имам и среќен сум поради тоа“, изјави Агуеро пред очите на расплаканата публика.
По обраќањето во кое едвај успеа да го каже тоа што сакаше, следеа највпечатливите моменти од кариерата на легендарниот напаѓач од Аргентина.
