Серхио Агуеро ја шокираше фудбалската јавност изјавувајќи дека фудбал не може да игра ниту рекреативно со другарите бидејќи срцето тоа не му го дозволува.
Аргентинскиот голгетер беше приморан на 33 години да замине во предвремена пензија откако му беше дијагностицирана срцева аритмија. На натпреварот против Алавес на 30 октомври 2021 година беше заменет во 42. минута откако не можеше да продолжи да игра поради замор. Тоа беше неговиот последен натпревар.
Сега Агуеро има проблеми дури и кога рекреативно сака да спортува. Се обидел да игра фудбал со другарите, како и тенис, но брзо губел здив.
„Сега кога се обидувам да играм фудбал или тенис, за брзо губам здив кога забрзувам. Едноставно чувствувам како срцето да не ми работи правилно. Дефинитивно е крај, веројатно ни рекреативно нема да можам да играм фудбал. Понекогаш се прашувам и дали ќе можам повторно да спринтирам“, разочарано изјави тој на својот канал на Twitch.
Раскажа и како се чувствувал по тој натпревар со Алавес кога сѐ уште не знаел што му е.
„Кога се случи, мислев дека не е ништо и дека ќе бидам добро, но кога дојдов во болница и кога ме ставија сам во мала соба со куп монитори околу мене, сфатив дека е нешто лошо. После дводневна хоспитализација почнав да станувам нервозен“.
Агуеро летоска дојде во Барселона, но одигра само 5 натпревари, а постигна и 1 гол. Претходно 10 сезони настапуваше за Манчестер Сити, 5 за Атлетико, а кариерата ја почна во Индепендиенте. За репрезентацијата на Аргентина одигра 101 натпревар постигнувајќи 41 гол, а минатото лето ја освои и Копа Америка.
