Андреа Ањели вели дека не му било лесно да си поднесе оставка од функцијата претседател на Јувентус, но тоа го направил со цел да избегне влијание врз одлуките во истрагата која е во тек во овој клуб.
Сега веќе поранешниот претседател на „Бјанконерите“ го водеше неговиот последен состанот со акционерите во Торино. Тој си поднесе оставка на 28 ноември заедно со сите останати од бордот на директори, вклучително и потпретседателот Павел Недвед и извршниот директор Маурицио Аривабене.
По понеделник, 26 декември, Exor, холдинг компанијата која контролира дел во клубот, именуваше нови членови на бордот кои официјално ќе бидат назначени денеска.
Ањели денешниот состанок на акционерите го отвори со краток говор: „Му посакувам сѐ најдобро на идниот претседател Фереро и на новиот извршен директор Сканавино. Ќе направам натамошни проценки во бордот на директори на наредниот состанок на 18 јануари“.
„Напуштањето на функцијата претседател за мене не беше лесна одлука. Освен што го сакам Јуве, напорно работев за да се постигнат неверојатни резултати последниве години, на и вон теренот“,
„Оваа одлука ја донесов најискрено, останувам убеден дека завршивме одлична работа изминативе години, мислење кое беше потврдено последниве недели преку анализите на бројните експерти: Јувентус ќе покаже легитимитет на секое поле“.
„Сметав дека е правилно да се повлечам, за да се избегне било кој да помисли дека изборите и одлуките кои отсега па натаму ќе бидат направени се условени од мојата лична вклученост“.
„Ми беше чест што бев претседател на Јувентус, кој доаѓа пред сѐ и пред секого. Фино ала фине!“.
Ањели беше назначен за претседател на Јуве во 2010 година. Под негово водство клубот освои 19 трофеи од кои 9 Скудета и по 5 пехари во Копа Италија и Суперкопа. Двапати беше на чекор од пехарот во Лигата на шампионите, но губеше во финалните натпревари. Јуве заедно со 12 од неговите сегашни и поранешни директорти се под истрага за наводни манипулации во сметководството и лажни пазарни извештаи, меѓу останатите обвинувања.