Поранешната германска канцеларка Ангела Меркел повторно ја бранеше својата политика на силно потпирање на Германија од увоз на енергија од Русија за време на нејзиниот мандат, тврдејќи дека тоа била правилна одлука во тоа време, објавија денеска германските медиуми.
„За периодот на транзиција ни требаше гас од Русија за еден ден тие да се префрлат на облици на енергија без јаглерод диоксид“, рече Ангела Меркел на тркалезната маса во Лисабон вчеравечер.
Таа објасни дека во времето кога била на чело на германската влада, потпирањето на рускиот гас изгледало како најлогично решение.
„Од тогашна гледна точка, беше рационално и само по себе разбирливо да се купува гас од Русија преку гасоводот наместо да се увезува скап течен гас од други делови на светот како Саудиска Арабија, Катар или САД“, рече Меркел, додавајќи дека „човекот постапува според времето во кое живее“.
Таа особено посочи дека во моментот кога Германија донела одлука за постепено затворање на нуклеарните централи и електрани на јаглен, потребна е замена за овие извори на енергија.
Поранешната германска канцеларка, која беше на чело на германската влада повеќе од 16 години, објасни дека Русија, односно Советскиот Сојуз, била сигурен партнер дури и за време на Студената војна кога станувало збор за снабдување со енергија.
„Не верувам во доктрината 'промена преку трговија', но верувам дека контактите можат да се зајакнат преку трговијата. И затоа денес не жалам за тогашните одлуки, но мислам дека тие беа исправни од тогашна перспектива“, рече Меркел во Лисабон на состанокот организиран од Фондацијата Гулбенкијан.
Поради рускиот напад врз Украина и прекинот на испораките на гас од Русија, Германија се сврте кон увозен течен гас и ја забрза изградбата на терминал за LNG на северот на земјата.
И покрај целосниот прекин на испораките од Русија, германската влада денеска соопшти дека резервоарите за гас се полни 95 отсто, неколку дена пред најавениот рок 1 ноември.