Аргентинскиот репрезентативец Анхел Ди Марија би можел да добие одлична понуда од Интер Мајами.
Откако ѝ помогна на Аргентина да го освои Светското првенство во Катар, Анхел Ди Марија постигна хет-трик против Нант и го однесе Јувентус во осминафиналето на Лига Европа.
Аргентинецот се поврзува со преселба во американската МЛС лига, а неговиот договор со Јувентус истекува ова лето. Иако Ди Марија наводно сака да остане во Европа, La Gazzetta dello Sport пишува дека тој е на радарот на Интер Мајами.
Јувентус би можел да му понуди помала плата на аргентинскиот фудбалер, додека Интер Мајами е подготвен да го „одврзе ќесето“ и да го привлече 35-годишниот фудбалер со атрактивна понуда.
Интер Мајами е во со-сопствеништво на Дејвид Бекам, кој постојано бара засилувања од светска класа. Клубот е заинтересиран и за Лионел Меси и Серхио Бускетс, чии договори истекуваат на крајот од сезоната.
„Сакаме да ги донесеме најдобрите играчи во светот во овој клуб. Меси и Бускетс се истакнаа во последните години. Тие се одлични играчи кои би дале огромен придонес за клубот. Тоа би било голема работа за МЛС“, изјави претходно тренберот на Интер Мајами, поранешниот соиграч на Бекам, Фил Невил.
