Асоцијацијата за цистична фиброза се огради од ставот на Игор Пехчевски, пациент со цистична фиброза, кој вчера објави дека директорката на Детската клиника, Стојка Фуштиќ му се заканила дека доколку продолжи да дава изјави за медиумите за него нема да има место во болницата.
„АЦФ којашто ги застапува интересите на сите пациенти без никаков исклучок како и досега ќе продолжи да дејствува за обезбедување современа терапија за сите пациенти со цистична фиброза.
Во врска со најновите случувања и изјава на пациентот Игор Пехчевски, член на АЦФ, Асоцијацијата се оградува од лично изнесениот став на пациентот поврзан со лечењето и третманот кон него.
Воедно, како Асоцијација на пациенти немавме и немаме забелешки за професионалниот пристап и третманот од страна на здравствените работници задолжени за оваа специфична здравствена состојба. Напротив, токму заради професионалниот пристап, голема е почитта кон сите нив меѓу кои и професорката Стојка Фустиќ, особено затоа што е достапна во секое време, без разлика дали станува збор за празник или нејзин слободен ден.
Сметаме дека личното незадоволство на нашиот член Игор, потенцијално може да оди на штета на сите пациенти и на она што Асоцијацијата до овој момент успеа да го постигне“, стои во нивното соопштение.
Пехчевски: Се смеам кога претседателот и неговиот заменик цимолат први да го добијат лекот
Пехчевски, кој е сместен на Универзитетската клиника за детски болести каде прима терапија за цистична фиброза со нов напис на социјалните мрежи и со нова порака за болните од цистична фиброза.
„Сострадувам и се борам за сите мои соборци болни од цистична фиброза, но се смеам кога потпретседателот и претседателот први ќе добијат од лекот, а пред да го добијат ќе цимолат и не можат да добијат ништо додека едно дете кое никој не го знае и познава не излезе со транспарент од болничкиот кревет ‘Трикафта за сите’“, пишува Пехчевски.
„Потоа, во името на Асоцијацијата за цистична фиброза каде сите треба да бидеме еднакви организираат средби, работни групи за да на крај го добијат лекот и без срам се оградуваат од БОРБАТА на еден свој СОБОРЕЦ, нарекувајки го Игор Пехчевски П.С. Фики Гаспар и Ивана Атанасоска, нели капетаните последни го напуштаат бродот, Вие први го сторивте тоа.
Нека ви служи на честа“, додава Пехчевски во напишаното.
Се обраќа и до Фуштиќ.
„Втор кикс на доктор Стојка Фуштиќ, лично од неа нарачано да дојде дежурната докторка на Детска клиника и да ми даде телефонски да разговарам дека за кратко време ќе стаса Психијатар со табелти за мене⁉
Се прашувам која ли е целта?
П.С Д-р Стојка Фуштиќ ако имате нешто да ми кажете повелете знаете каде сум“, порачува Пехчевски.