Американскиот претседател Џозеф Бајден го нарече „ужасен“ нападот врз Пол Пелоси, сопругот на претседателката на Претставничкиот дом на американскиот Конгрес, Ненси Пелоси.
Смета дека сите оние кои шират лаги за нефер избори ја контаминираат политичката клима и придонесуваат за политички мотивирано насилство.
Пол Пелоси бил нападнат вчера во неговиот дом во Сан Франциско, а по физичкиот напад бил успешно опериран.
Бајден вчера ѝ се придружи на потпретседателката Камала Харис во едно од ретките заеднички појавувања, на настан во Пенсилванија.
-Што е многу, многу е. Секој совесен човек треба јасно и недвосмислено да застане против насилството во нашата политика, без разлика на политичката определба. Демократијата буквално, а не фигуративно, годинава е на тест, кажа Бајден, алудирајќи на претстојните парламентарни избори на 8 ноември и предупредувајќи на опасностите од екстремизмот.
Бајден кажа и дека полицијата има индиции дека нападот врз Пол Пелоси всушност бил насочен кон Ненси и рече дека напаѓачот со чекан извикал „каде е Ненси?“ – што можело да се слушне и од приврзаниците на поранешниот претседател Доналд Трамп за време на смртоносните немири во Капитол на 6 јануари минатата година, додаваат британските медиуми.
Напаѓот е 42-годишен маж од Канада за кој CNN пренесе дека на социјалните мрежи објавувал содржини против вакцините за COVID-19, теории на заговор за американските избори во 2020 година во САД, како и за нападите на Капитол во 2021 година.
Тој во САД се доселил пред две децении, а во ниту една од неговите објави со теории на заговор не се споменува Ненси Пелоси, пренесе CNN.
