Барикади, легитимирање, дозвола па пристап. Вака изгледа овогодинешното одбележување на 120 години од смртта на Гоце Делчев.
Пристап до гробот во црквата „Свети Спас“ во Скопје имаа делегациите кои беа најавени, новинарите кои беа акредитирани и граѓани кои можеа да поминат еден по еден – по претходен редослед од полицијата. Годинава, настанот беше третиран со голем ризик поради можни ескалации.
Околу 30 полицајци беа распоредени на првите барикади. Педесетина метри подоле имаше нови барикади, со други полицајци. Имаше и службеници во цивилна облека. Слично како овојпат, се славеше годишнината од раѓањето на Делчев.
Службениците беа распоредени уште во текот на вчерашната вечер, за да спречат евентуални инциденти при славењето.
Владина делегација со положување цвеќе на гробот на Гоце Делчев ја одбележа 120 годишнината од неговото загинување
Владина делегација составена од министерот за внатрешни работи Оливер Спасовски, министерката за животна средина и просторно планирање Каја Шукова и заменик министерот за образование и наука Агим Нухиу со положување цвеќе на гробот на Гоце Делчев во црквата „Св. Спас“ во Скопје, ја одбележа 120 годишнината од загинувањето на идеологот и синонимот за народна борба за слобода.
Пред саркофагот на великанот се поклонија и му оддадоа почит и претседателот на Република Северна Македонија Стево Пендаровски и делегациите на Собранието, на Министерството за одбрана, на Армијата, на Сојузот на борците, на Македонската академија на науките и уметностите, на Град Скопје, на политичките партии, на дипломатскиот кор, како и други почитувачи на делото на Гоце Делчев.
Со пригодна богослужба за помен на мртвите чиночествуваше архиепископот на Македонската Православна Црква – Охридска Архиепископија Г.Г. Стефан.
Визионерот Делчев, кој пред повеќе од еден век го разбра светот како поле за културен натпревар на народите, беше убиен од турската војска на 4 мај 1903 година во селото Баница, на пат кон Сер. Тој ја застапуваше каузата за искрена борба за прогресивно-културна држава, основана врз радикални и социјални принципи во која доброволно ќе се здружат сите угнетени народи и ќе ја продолжат сестраната борба.
