Педри, тинејџерската сензација на Барселона, толку млад и само на вториот настап за Шпанија, за влакно немаше да може да игра фудбал долго време.
Во последната минута од судиското надополнување на квалификацискиот натпревар за Светското првенство, што во Тбилиси го одиграа Грузија и Шпанија (1:2), Леван Шенгелија дивјачки и со двете нозе стартуваше врз 18-годишниот Педри.
На грузискиот репрезентативец му побегна топката и Шпанецот тргна по неа. На тоа, Шенгелија одговори со лизгачки старт со двете нозе и го „поткопа“ Педри кој летна во воздух.
Педри слета грубо на тревникот држејќи се за глуждот. Иако нападот врз него се чинеше страшен, за среќа тој помина без потешка повреда што можеше да го стави на клупа подолго време. Судијата Петреску веднаш го исклучи Шенгелија.