Со големо изненадување ги прифаќаме објавените податоци за бројот на граѓани во Република Северна Македонија, кои на Пописот се самоидентификувале како Бугари, соопшти бугарското Министерството за надворешни работи.
– Ја забележуваме драстичната неусогласеност меѓу овие податоци и податоците за бројката од над 100.000 граѓани на Република Северна Македонија кои лично поднеле документи со кои се докажува бугарско потекло и самосвест за добивање бугарско државјанство, се наведува во реакцијата на бугарското МНР.
Според Министерството, „предмет на сериозна анализа“ е фактот што не се преброени 7,2% од граѓаните во земјава, за кои податоците се обезбедени преку соодветни бази на податоци „без да може да се утврди нивната етничка или верска припадност“.
Софија забележува и дека нема информации колкав е бројот на државјани на земјава со бугарско национално чувство кои се попишани меѓу нерезидентното население.
– Со особено внимание ги имаме предвид сомнежите искажани околу транспарентноста и кредибилитетот на процесот наведени од организациите на Бугарите во Северна Македонија, како за време на пописот, така и при објавувањето на резултатите. Очекуваме нивниот глас да го слушнат и властите во Северна Македонија, соопшти бугарското МНР.
Министерството посочува и дека Бугарија во повеќе наврати истакна дека од огромно значење е создавањето услови за слободно самоидентификување на граѓаните со бугарско национално чувство во земјава и гарантирање на нивните права.
Според податоците од Пописот објавени во средата, како Бугари се изјасниле 3.504 лица, што претставува минорни 0,19% од резидентното население.
