„За некои клубови навивачите станаа потрошувачи, фановите станаа купувачи, а натпреварувањата станаа продукти“, вака претседателот на УЕФА уште еднаш им го покажа местото на непослушните парајлии кои се дрзнаа фудбалот да го претворат во чист бизнис.
Александер Чеферин продолжува со нападите врз 12-те клубови кои најавија формирање на таканаречена Супер лига, натпреварување чија единствена цел е заработка на баснословна сума на пари.
„Себичноста ја заменува солидарноста. Парите станаа поважни од славата, алчноста поважна од лојалноста и дивидендите поважни од страста“, вели Словенецот на чело на Европската куќа на фудбалот, а пренесува Tuttomercato.
„Фудбалот не припаѓа никому. Или, уште подобро, му припаѓа секому, бидејќи фудбалот е дел од нашето наследство“.
„Денешните великани не беа сите големи клубови во минатото, а нема гаранција дека ќе бидат такви во иднина и треба да сфатат дека тоа што сега се европски гиганти е делумна заслуга на УЕФА“.
„На натпреварувањата на УЕФА потребни им се приказни како оние на Аталанта, Селтик, Ренџерс, Галатасарај. Потребни ни се овие клубови, луѓето мора да знаат дека сѐ е возможно, дека секој има шанса да победи“, дополнува тој.
„Денешните великани не биле отсекогаш великани и нема гаранција дека ќе бидат великани во иднина. Фудбалот е динамичен и непредвидлив“, завршува претседателот.
Јасно е дека УЕФА нема да попушти, а на нејзина страна застана и ФИФА. Времето ќе покаже до каде може со инатот да одат 12-те одметници и какви санкции ќе добидат заради својата алчност и себичност доколку навистина продолжат со она кое го најавија.
