Поранешен борец на приватната воена компанија Вагнер, кој по грешка бил прогласен за убиен во акција додека се борел во Украина, го посетил сопствениот гроб дома во Русија, бидејќи неговото семејство добивало пари за неговата „смрт“. 44-годишниот Сергеј К., поранешен затвореник од Бурјатија, една од руските републики што се граничи со Монголија, бил регрутиран во редовите на платеници и бил ранет на фронтот во Украина во април, пишува рускиот медиум МК.ру.
Вагнер регрутирал десетици илјади поранешни затвореници дури и кога беше предводен од покојниот шеф Јевгениј Пригожин. Тој одигра важна улога во регрутирањето борци за руските операции во Украина, нудејќи им на машките затвореници намалени казни и парични стимулации во замена за 6 месеци воена служба.
Минатиот декември, Владимир Осечкин, руски активист за човекови права кој интервјуираше поранешни вагнерци, изјави за Newsweek дека дури 30.000 затвореници биле регрутирани од затворите и распоредени во Украина. Во врска со овој случај, МК.ру наведува дека додека Сергеј бил на лекување во болница, неговото семејство било погрешно информирано дека тој е убиен во украинската област Луганск.
Во неговиот дом бил донесен ковчег, а на неговото семејство му било дадено посмртен лист. Адвокатот на Сергеј, Андреј Кибирев, тврди дека борецот на Вагнер не контактирал со своите роднини додека бил во болница, со објаснување дека не сакал да ги „налути“. Во јули тој се јавил на една од неговите сестри, која „западнала во состојба на шок“, рече Кибирев.
Сестрата наводно му рекла на Сергеј дека го „закопале“ пред 40 дена. На неговото семејство му биле исплатени и речиси 6 милиони рубли (околу 61.000 евра) како компензација за неговата „смрт“. Адвокатот рече дека Сергеј „се обидува да ја третира ситуацијата со хумор“. „Неодамна го посети неговиот гроб, вели не очекувал толку добро да биде погребан“, додаде Кибирев.
На 19 октомври, потврдата за смртта на Сергеј беше поништена откако Окружниот суд во Република Бурјатија разговараше со неговото семејство и утврди дека неговите отпечатоци се совпаѓаат со оние што се зачувани во владината база на податоци.