Германската полиција негираше дека полицајците се однесувале како „статисти за Грета Тунберг“ откако се проширија теории дека нејзиното приведување на протестот во западна Германија било изрежирано.
Грета и други активисти се обидоа да го спречат уривањето на напуштеното село Луцерат заради проширување на рудник за јаглен.
Видео од приведувањето на Грета брзо стана вирално. На видеото се гледа насмеаната Грета како стои во друштво на двајца полицајци, додека во исто време околу неа се движат фотографи. Во близина има уште неколку полицајци кои чекаат да се изврши апсењето. Таа снимка ги поттикна шпекулациите дека приведувањето на климатската активистка е всушност лажно.
„Полицијата чекаше од логистички причини“
„Никогаш не би се согласиле да учествуваме во такво нешто“, рече портпаролот на локалната полиција, негирајќи дека приведувањето било лажно. Тој ја истакна важноста полицијата да ја гарантира заштитата на медиумските работници. Министерството за внатрешни работи на покраината Северна Рајна Вестфалија за BBC потврди дека полицајците и Грета чекале од логистички причини.
„Мораа да почекаат неколку минути пред да ја доведат до полициското возило“, изјави портпаролот на Министерството. Тој додаде дека „целата ситуација ја искористиле оние со политички мотиви, а вистинската причина е сосема практична и приземна“.
Кристијан Вернике, новинар од германскиот весник Süddeutsche Zeitung, кој во тоа време бил таму, рече дека полицајците „одлучиле да ја продолжат проверката на идентитетот и чекале да ја одведат Грета до полициското возило“.
„Мојот впечаток беше дека настана конфузија. Грета не беше првиот демонстрант што беше однесен од протестот“, додаде Верник.
„Видов различни реакции на видеото. Некои велат дека видеото изгледа како полицијата да сака да ја засрами, а други дека сето тоа е дел од некаква пропаганда. Луѓето го толкуваат и го користат ова видео за свои мотиви", заклучува новинарот.
