Шведската полиција дозволи денеска да се одржи мал протест пред џамија во Стокхолм, каде организаторите ќе го искинат Куранот и ќе го запалат, што може дополнително да го искомплицира обидот на Шведска за влез во НАТО, пишува Reuters.
Серијата протести во Шведска против исламот и за правата на Курдите ги зголемија тензиите со Турција, чија поддршка Шведска треба да добие за да се приклучи на Северноатлантскиот договор.
Претходно, шведската полиција одби неколку барања за протести против Куранот, но судовите ги укинаа тие одлуки, тврдејќи дека тие ја нарушуваат заштитената слобода на говор.
Полицијата објави дека иако тоа „може да има надворешнополитички последици“, безбедносните ризици и последици поврзани со палењето на Куранот не се од таква природа што барањето треба да се одбие.
Според полицијата во Стокхолм, во протестите се очекува да учествуваат само две лица, вклучително и организаторот Салван Момика, кој во едно неодамнешно интервју за весник се опиша себеси како ирачки бегалец кој сака да го забрани Куранот.
На крајот на јануари, Турција ги прекина преговорите со Шведска за аплицирање за членство во НАТО, откако Расмус Палудан, лидерот на данската екстремно десничарска политичка партија, запали примерок од Куранот во близина на турската амбасада во Стокхолм.
Палудан не се очекува да учествува на денешниот протест.
Неколку арапски земји, вклучувајќи ги Саудиска Арабија, Јордан и Кувајт, го осудија палењето на Куранот во јануари. Турската амбасада во Стокхолм не беше достапна за коментар.
Шведскиот премиер Улф Кристерсон изјави претходно денеска дека неговата земја сè уште сака да се приклучи на НАТО пред или на самитот во Вилнус следниот месец, иако не е сигурно дека дотогаш ќе може да го направи тоа.
