Жените би можеле да бидат поранливи од мажите на екстремните температури кои деновиве се бележат во Европа, сметаат експертите.
Особено топло ќе биде во четврток и петок кога наместа температурата ќе надмине 40 степени и ќе биде активно портокалово ниво на опасност од високи температури, известува УХМР.
Се препорачува да се избегнува излегување надвор во периодот од 10 до 17 часот. Во тој период да се избегнуваат физички активности, да се седи во затворени климатизирани простории.
Меѓу ризичните групи, покрај постарите од 75 години, бебињата и малите деца, лицата со тешки физички и психички заболувања, спаѓаат и жените, според студија спроведена во Холандија, која ја разгледа стапката на смртност по топлотните бранови и откри дека постарите жени имаат поголем ризик од смрт од мажите. Истражувачите наведуваат дека резултатите не може да се припишат само на возраста, пренесува британски Guardian.
„Кога ја земавме предвид еднаквата возраст, стапките на смртност кај жените сè уште беа 15 отсто повисоки“, напиша тимот во анализата на податоците од топлотниот бран во 2003 година што ја погоди Франција.
Друга студија, направена од истражувачи од Германија и Холандија, ги разгледа 23-годишните податоци за температурата од Холандија заедно со податоците за стапката на смртност. Тие откриле и разлики меѓу жените и мажите.
„Смртноста поврзана со топлина е почеста кај жените отколку кај мажите, особено кај најстарата возрасна група (над 80 години) изложена на екстремна топлина“, објаснуваат научниците од студијата.
Се чини дека ова не се објаснува со фактот дека постарите луѓе се поподложни на топлина и дека жените генерално живеат до постара возраст од мажите, додаваат тие.
Според авторот на студијата, Хајн Даанен, професор по физиологија на Универзитетот во Амстердам, тимот шпекулирал дека помалото производство на пот кај жените во однос на мажите може да игра улога.
„Грубо земено, постарите луѓе се потат половина повеќе од младите, а жените се потат половина од мажите“, вели Даанен. Со други зборови, се вели во студијата, „способноста на постарите жени да ја регулираат телесната температура преку потење е најниска од сите групи“.
Тимот исто така наведува дека стресот на кој е изложен кардиоваскуларниот систем на топлина може да биде одговорен за поголема смртност.
„Кардиоваскуларниот стрес е поголем кај жените, што потенцијално ја објаснува нивната повисока стапка на смртност на повисоки температури“, напишаа истражувачите.
Друга можност, додаваат тие, е дека постарите жени имаат поголема веројатност да живеат сами, познат ризик фактор за топлотни бранови, и генерално се помалку активни од мажите, иако се поактивни во домаќинството.
„Жените кои се помалку фит и продолжуваат да се занимаваат со домашна работа за време на топлотните бранови се изложени на поголем ризик од прегревање од мажите, што предизвикува стрес на нивниот кардиоваскуларен систем“, напишаа истражувачите.
Оли Џеј, професор на Универзитетот во Сиднеј, исто така наведува дека студиите покажале дека максималната стапка на пот кај младите здрави жени е помала отколку кај нивните машки врсници.
„Сè уште не знаеме дали тоа е причината за повисоките стапки на смртност кај жените за време на топлотните бранови. Нејасно е дали постои корелација помеѓу полот и возраста“, објаснува Џеј.
Мајк Типтон, професор по физиологија на Универзитетот во Портсмут, вели дека жените можеби се поранливи бидејќи имаат повисока телесна температура по овулацијата и често се помали од мажите. Затоа, тие имаат поголем сооднос на масата со површината на телото, што значи дека побрзо се загреваат.
Сепак, „најверојатниот одговор е дека тоа е комбинација на фактори и треба да направиме повеќе истражувања за да разбереме што се случува“, вели Џеј.
