Џамија во Берлин стана првата во Германија која развеа знаме со виножито за поддршка на ЛГБТ заедницата, пред Парадата на гордоста што треба да се одржи подоцна во јули.
Џамијата Ибн Рушд-Гете во централниот кварт Моабит развиори знаме пред петочната молитва пред помала публика. Таму беше и берлинскиот сенатор за култура Клаус Ледерер.
Присутните носеа налепници во боја на виножито на кои пишуваше „Љубовта е халал (дозволена)“. Џамијата, основана пред пет години, е единствената самопрогласена либерална џамија во Германија и им овозможува на мажите и жените да се молат заедно, а исто така е отворена и за ЛГБТ верниците.
„Квир луѓето може да бидат религиозни и да веруваат во Бог“
Мо Ел-Кетаб, еден од шесте имами во џамијата, рече дека сака џамијата да обезбеди „безбедно место за луѓето кои се различни, за да можат и тие да ја искусат духовната страна на нивниот живот“. „Се надевам дека многу други џамии ќе го истакнат знамето на овој начин или ќе постават други позитивни знаци за ЛГБТ заедницата“, рече тој.
Овој месец, Берлин ќе биде домаќин на два големи настани за поддршка на ЛГБТ заедницата - фестивалот на лезбејките и хомосексуалците на 16 и 17 јули и Берлинската парада на гордоста позната како Ден на улицата Кристофер (CSD) на 23 јули.
Марк-Ерик Леман, член на одборот на ЦСД, рече дека истакнувањето на знамето е „неверојатно моќен знак“ и дека е „навистина важно“ да се најде простор за религија во ЛГБТ заедниците. „И квир луѓето можат да бидат религиозни и да веруваат во Бог“, рече тој.
„Не треба да зборуваме само за безбедни простори во баровите и клубовите во Берлин, туку треба да зборуваме и за безбедни простори во местата за богослужба“, додаде тој.