Македонскиот репрезентативец оди на позајмица во потрага по поголема минутажа и тоа во заспаниот џин Шалке 04.
Тимот од Гелзенкирхен денеска потврди дека Дарко Чурлинов е ново засилување за тимот кој лани испадна од Бундеслигата и оваа сезона ќе проба да се врати назад во елитата.
„Дарко е напаѓач кој може да игра на разни позиции и на противничките дефанзивци знае да им да го загрози животот со неговата брзина и дриблинг еден на еден. Има способност да создава опасност со неговите длабоки втрчувања зад одбраната, знае да постигнува голови и игра со двете нозе. Неговиот стил на игра одлично се вклупува во нашиот тим и многу сме задоволни што го остваривме овој трансфер“, рече спортскиот директор на клубот, Роувен Шредер.
Чурлинов ќе настапува како позјамен играч во тековнава сезона и ќе го носи дресот со бројот 7. Двата тима се договориле деталите од трансферот да не се објавуваат јавно.
„Среќен сум што овој трансфер се оствари. Разговорите со клубот одеа добро, што мојата одлука ја направи лесна. Како тим имаме многу што да постигнеме и сакам да дадам мој придонес во тоа“, се првите зборови на Дарко како играч на Шалке 04.
Дарко во Германија е од 2015 кога ѝ се приклучи на акдемијата на Ханза од Росток кога имаше 14 години. Претходно настапуваше во младинските категории на Работнички и Вардар. После една сезона во Ханза се пресели во Магдебург каде исто така се задржа една сезона, а потоа замина во Келн, тим со кој го имаше своето деби во Бундеслигата. Во јануари лани прво замина на позајмица во Штутгарт кој потоа и целосно го откупи од Келн. За Штутгарт го постигна и својот прв гол во 2.Бундеслига.
Чурлинов беше дел од репрезентацијата на Македонија која настапи на ЕУРО 2020, а претходно исто така беше дел и од репрезентацијата до 21 година која играше на младинското ЕУРО 2017 во Полска. Досега има 5 настапи за сениорската репрезентација за која е и најмлад дебитант (16 години, 8 месеци и 17 дена на пријателска со Белорусија во 2017). Се очекува да биде на списокот и на новиот селектор Благоја Милевски за претстојните септемвриски мундијалски квалификации.
Шалке 04 е седумкратен германски шампион (последен пат во 1958) и петкратен освојувач на ДФБ купот (последен пат во 2011) и важи за еден од најбогатите и најстабилните клубови во Германија. Но, ланската лоша сезона направи првпат по точно 30 години да испадне во втората лига. По три кола во 2.Бундеслига новиот тим на Дарко има скор од победа, реми и пораз.
