„Де бе, што е проблем да го заобиколиш?“ е позиција на привилегираниот, повештиот. Но градот треба да биде безбеден и удобен и за најранливите, и за најмалку вештите. Точак треба да можат возат и децата и старите, и лицата со посебни потреби, не само физички најспремните.
Вака почнува објавата на #НаТочак, групата ентузијасти чија заедничка цел е подобро велосипедско Скопје, кои постојано работат на активности за кревање на свеста и промовирање на културата на користење велосипед како превозно и рекреативно средство.
„Некаде има доволно простор, но покрај контејнерите има мали невидливи рабници кои треба да се засечат под остар агол и на кои лесно се лизнува тркалото, некаде нема ни доволно простор да се помине, некаде е намалена видливоста... Да, позицијата на контејнерите е реален проблем, за некого помал, за некого поголем. Но, не се проблем само позициите“, велат тие.
„Многу поголем проблем е начинот на кој е донесена одлуката, веројатно скокањето на процедурите или лошо дефинираните процедури, несоработката меѓу секторите, несоработката со граѓанскиот сектор.
Минатата година кога бевме известени постфестум дека новите контејнери стигнале и дека ќе прават проблем на велосипедските патеки и да бидеме трпеливи додека не смислат решение, бевме решени да бидеме трпеливи.
Само поставивме неколку прашања во обид да дојдеме до одговор на тоа: како можело воопшто да дојде до ваков проблем, ако секторите соработувале меѓу себе и ако се почитувале процедурите. Едноставно бевме љубопитни како тоа воопшто можело да се случи. И како и секогаш сакавме конструктивно да помогнеме да се коригираат пропустите во правилата и процедурите“, објавнуваат од #НаТочак.
Тие додаваат дека ги поставиле прашањата објавени на блогот, но никогаш не добиле одговор.
„Да, позицијата на контејнерите е реален проблем. Но, уште пореален проблем се нетранспарентноста и ‘ми текна’ одлуките кои не предвидоа однапред дека ќе има привремени решенија, туку сфатија дури откако стигнаа контејнерите.
Ако не се даваат одговори за обични контејнери кои нели не се голем проблем, тогаш што би се случило кога ќе се работи за планирање на населби, за траси на сообраќајници, за покрупни сообраќајни политики?
Дали и за нив нема да се даваат одговори?
Затоа реагираме!“, заокружуваат од #НаТочак.
