Ruwiki, руската верзија на популарната онлајн енциклопедија Wikipedia, треба да почне со работа до денеска.
Бета тестирањето на веб-страницата, со ограничен број посетители, започна во средината на 2023 година. Се вели дека Ruwiki веќе има повеќе страници и содржини од Wikipedia на руски јазик, која брои над 1.956.000 содржини.
Руските медиуми истакнуваат дека оваа земја сè уште не планира да ја блокира Wikipedia, иако руските судови редовно ја казнуваат онлајн енциклопедијата - најмногу поради објавување содржини што се во конфликт со руската верзија за војната во Украина.
Рускиот претседател Владимир Путин во мај 2022 година даде одобрение за нови алтернативни платформи кои ќе ја заменат Wikipedia, јавуваат руските медиуми.
Се истакнува дека најчитани текстови во бета-периодот на Ruwiki биле листата на загинати во текот на 2023 година, ескалацијата на конфликтот во Газа, руските воени операции во Украина и филмовите со најголема заработка во Русија.
Во пробниот период, просечниот корисник поминува повеќе од 6 минути на страницата, додека просечната должина на читање е над 5 страници.
Основачите на Ruwiki не објавија колку чинел проектот, а не се познати ниту имињата на инвеститорите кои ги вложиле своите средства во веб-страницата.
До руската Wikipedia може да се пристапи преку адресата https://ru.ruwiki.ru/.
Тоа што Ruwiki е лансирана токму на 15 јануари не е изненадување и овој датум е намерно избран. Имено, на истиот ден во 2001 година беше лансирана Wikipedia.