Славниот актер Џон Траволта им се заблагодари на обожавателите за поддршката по смртта на неговата сопруга.
Откако Кели Престон почина по тешка борба со карцином на дојка, Траволта со емотивна порака им се заблагодари на обожавателите за големата поддршка во последните неколку месеци.
Престон почина во јули годинава, по двегодишна борба со карцином. Траволта не беше особено активен во последните неколку месеци, но кратко им се обрати на пријателите на социјалните мрежи, по повод Денот на благодарноста.
„Само сакам да ви се заблагодарам на сите вас за неверојатната поддршка оваа година. Среќен Ден на благодарноста и секогаш сакајте“, порача Траволта.
Кели и Џон беа во брак од 1991 година и заедно имаат три деца. Најстариот син Џет почина на 16-годишна возраст, ќерката Ела има 20 години и синот Бенџамин 10 години.
По смртта на актерката, Траволта на социјалните мрежи напиша дека неговата сопруга храбро се борела со тешката болест, со поддршката на многу луѓе.
„Моето семејство и јас засекогаш ќе им бидеме благодарни на докторите и на медицинските сестри во сите медицински центри кои ни помагаа, како и на бројните пријатели кои беа покрај неа. Засекогаш ќе ги памтиме љубовта на Кели и заедничкиот живот“, напиша актерот.
