Сараево денеска е најзагаден град во Босна и Херцеговина и еден од најзагадените во светот со индекс на квалитет 266, кој спаѓа во категоријата многу нездраво за населението.
Позагадени градови од Сараево се Дака, Бангладеш, Лахоре, Пакистан и Багдад.
Во такви услови, лицата со респираторни заболувања, како што е астмата, може да доживеат значително зголемување на симптомите и интензитетот на болеста, а се зголемува и веројатноста за негативни последици по респираторните органи на целата популација.
Ако индексот за квалитет на воздухот е од 0-50 тогаш е здрав, од 51-100 е умерено загаден. Сè што е повеќе од 100 е нездраво, а повеќе од 300 е опасно по здравјето.
Во Сараево од почетокот на годинава квалитетот на воздухот неколку пати е лош, а во некои денови и опасен по здравјето.
Скопје пред точно еден месец се искачи на третото место по загаденост на листата на поголеми градови во светот - со индекс на загаденост од 182, според интернет платформата IQAir, која објавува сопствени податоци за загаденоста во градовите ширум светот во реално. Тогаш први на листата беа Делхи во Индија со индекс од 215 и Лахор во Пакистан со 255.
На денешната листа Скопје се позиционира на 66-тото место, со индекс од 45. Неколкудневните врнежи дожд сигурно придонесоа за расчистување на воздухот во главниот град.
Студиите за загадување во главниот град покажаа дека воздухот во Скопје нема да се прочисти целосно сè додека масовно се користи дрвото за огрев. Но, покрај согорувањето на биомасата коешто претставува најголем извор на загадување на амбиенталниот воздух, како „трујачи“ на воздухот се посочуваат и индустријата и градежништвото. Загадуваат и автомобилите, поради што надлежните предлагаат алтернативи - пешачење, возење на велосипед и користење на јавен превоз, пишува Дојче веле.
