Српскиот кошаркарски стручњак, Драган Николиќ, од денеска е нов тренер на МЗТ, откако потпиша договор до крајот на сезоната со можност тој да биде продолжен и до јуни 2024 година.
– Станува збор за добро познато име за македонската спортска јавност, со оглед што во сезоната 2016/2017 повеќе од успешно го предводеше Карпош Соколи во АБА лигата и ни беше повеќе од достоен ривал во битката за титулата во првата лига, која на крајот ја обезбедивме дури по мајсторка. Николиќ има и македонски пасош со оглед на потеклото на неговото семејство од нашата земја, а згора на тоа негова сопруга е една од најдобрите македонски кошаркарки на сите времиња, Марија Видикова, објавија попладнево „сино-белите“.
Последен клуб на 50-годишниот Николиќ беше Борац од Бања Лука (2020-2022) со кој настапи на завршниот турнир од АБА2 годинава во април во Скопје. Претходно ги предводеше Игокеа, полски Кошалин, Младост Земун, а на почетокот на XXI век неколку сезони беше тренер на поранешниот женски гигант од Охрид, тимот на Профитнес.
Популарниот Гаги се очекува денеска да пристигне во Скопје, а дебито на клупата ќе го има в петок на гостувањето кај Цибона во натпреварот од од 13. коло од АБА лигата.
Македонскиот шампион пред неколку дена остана без тренер откако беше прекината соработката со Александар Петровиќ.
