Припадниците на спасувачките служби по 24 часа од катастрофалниот земјотрес во Елазиг под урнатините спасија две и полгодишно девојче.
Спасувачките екипи во еден момент чуле глас под урнатините на зграда во населбата Мустафа Паша. Набргу воспоставиле контакт со жена која им кажала дека со неа под урнатините има и дете, пренесува Анадолија.
Жената со расплакан глас молела за помош, велејќи дека повеќе не може да издржи. Спасувачките екипи ги вложиле сите сили и ископале тунел од каде успеале да дојдат до местото и да го извлечат девојчето, кое е префрлено во болница. Спасена е и мајката.
Според најновите податоци, урнати се вкупно 72 згради во земјотресот, додека 514 се со голема оштетеност, а 409 со помала.
И понатаму трае потрагата по спасување на преживеаните под урнатините.
Денеска се случи уште еден земјотрес во провинцијата Елазиг, со јачина од 5,1 степени по Рихтер.
