Во приштинскиот локал „Бон Виван“ во пукотница што се случила нешто пред полноќ, еден маж загина, а 17 лица се повредени, објавуваат српските медиуми.
Неколку од лицата се повредени од истрели од огнено оружје, а останатите се повредени од парчиња од стакло поради кршењето на излозите што се случило како последица на пукањето.
Според изворите од местото на настанот на порталот Reporteri.net, тепачката меѓу двете групи започнала надвор од локалот, која потоа продолжила во внатрешноста на локалот, каде што се пукало. Соопштено е дека од истрелите се повредени неколку лица, додека еден од нив е во тешка состојба. Сведоците виделе како Брзата помош ги одвела повредените да ги испрати на лекување.
Полицијата целосно ја блокирала областа, вклучувајќи ја и улицата „Луан Харадинај“.
За случајот преку известување се изјасни и косовската полиција: „Околу 23 часот и 30 минути во кафеана на улицата 'Реџеп Луци' во Приштина биле пријавени истрели од огнено оружје. Полицијата веднаш излезе на местото на настанот и од првите информации се сомнева дека има повредени од огнено оружје, па дури и од фрагменти од стакло. Додека повредените се испратени на неопходна лекарска помош, полицијата продолжува со работа, односно увид на местото на настанот како и со други оперативно-истражни дејствија“.
Во моментов, најмалку двајца осомничени се идентификувани како вмешани во случајот, додека се работи и на идентификување на други можни осомничени.
