Министерот за здравство, Венко Филипче ја одржа редовната прес-конференција на која информираше за состојбата на пациентите кои се заразени од коронавирус во нашата земја.
На Клиниката за инфективни болести и фебрилни состојби од Ковид-19 починаа двајца мажи, едниот на возраст од 45 години од Куманово, другиот на возраст од 78 години од Дебар.
„Починатиот од Куманово имал дијабет, атријална фибрилација, хипертензија и обезност, додека починатиот од Дебар имал ХОБ (Хронично обструктивен бронхит) и хипертензија и примал терапија за двете хронични заболувања“, рече Филипче.
Во изминатите 24 часа направени се 392 тестирања, а потврдени 44 нови случаи на коронавирус во земјава. По градови: Куманово 23, Скопје 12, Тетово 2, Битола 3, Струга 2, Штип 1, Прилеп 1. Со ова вкупната бројка на дијагностицирани пациенти со COVID-19 денеска изнесува 329 лице. Според местото на живеење, досега случаи на COVID-19 се регистрирани во: Скопје 175, Дебар 47 и Куманово 47, Штип 14, Тетово 10 и Прилеп 10, Струга 7, Велес 6, Битола 4, Охрид 3, Кавадарци 2, Гостивар, Крива Паланка, Струмица и Гевгелија 1.
Од 392 направени тестови во изминатото деноноќие: 262 се направени преку ИЈЗ, 26 преку Ветеринарен факултет, 24 преку лабораторијата Биотек и 80 преку Болницата „Филип Втори“ (Жан Митрев). До сега се направени вкупно 3.518 тестови на COVID-19. Се чекаат резултати за уште две лица, од кои едното тестирање е направено посмртно.
Во однос на болницата во Охрид, министерот истакна дека се откриени пропусти во односот кон пациентката од струшко која почина откако не беше згрижена во Охрид.
