Комуникацијата е од суштинска важност за успех на работа, а тука често правиме мали и големи грешки. Комуникацијата на работа има свои правила, по природа е конзервативна, но смислата на нашите пораки мора секогаш да биде јасна.
Затоа внимателно морате да употребувате изрази кои често ги користите. А, психолозите сметаат дека доколку користите фраза како „Жал ми е што така се чувствувате“ испраќате сосема погрешна порака.
Прво, тоа воопшто не претставува извинување. Вие не можете да се извинувате за тоа како некој друг се чувствува. Може да ви биде жал само поради вашето однесување и работите кои вие ги контролирате. Не можете да контролирате како другата личност ќе се чувствува, па затоа и немојте поради тоа да се извинувате.
Второ, многу поважна е скриената смисла на вашите пораки, која би можела да гласи и вака: „Видете, не знам зошто сте толку ирационални поради ова. Тоа не е моја вина и безмислено е мене да ми се лутите“. Дури и доколку тоа навистина не го мислите, во најголем број случаи вашата реченица ќе звучи токму така.
Трето, со зборовите дека ви е „жал што така се чувствува“, вие всушност избегнувате било каква одговорност за новонастанатата ситуација. Наместо тоа, ако сметате дека некаде сте погрешиле, кажете го тоа. На пример: „Многу ми е жал што не успеавме да го направиме она што го ветивме“...
Четврто, кога работите со луѓе, често ќе се случува вие да не сте одговорни за некој пропуст, но решавањето на проблемот да е во ваша надлежност. Во тој случај наместо извинување понудете решение: „Гледам дека сте многу фрустрирани. Ќе видам што можам да направам за да го решиме тоа“.
На крајот, поентата е во тоа на другата личност да ѝ покажете дека сте ја сфатиле и дека сте на „нејзина страна“. Ќе се изненадите колку таквиот став може да ви помогне во комуникацијата на работа.
