Жените се недоволно застапени во германските вооружени сили. Ова треба да се промени со реформирање на законот. Но, тоа нема да биде лесно да се спроведе во пракса, пишува Deutsche Welle.
Германскиот Бундесвер има потреба од луѓе за зајакнување на воената способност на земјата како одговор на руската војна во Украина.
Бундесверот има околу 180.000 војници - од кои 24.000 се жени, не сметајќи ги цивилите кои работат за армијата. Според владините податоци, жените сочинуваат 9,5 отсто од работната сила, а 45 отсто во медицинскиот и здравствениот сектор.
Владата на канцеларот Олаф Шолц неодамна усвои низа мерки за подобрување на родовата еднаквост во војската, чија цел е усогласување на процедурите во Бундесверот со неодамнешната реформа на законите кои се однесуваат на владата како целина. Според владината дефиниција, учеството на жените треба да биде поголемо од 20 проценти вкупно.
„Жените сè уште се недоволно застапени во Бундесверот“, изјави за новинарите владиниот портпарол Штефен Хебестрајт. Тој додаде дека германската влада верува дека поголем број жени во армијата придонесуваат за Агендата на ОН 2030 за одржлив развој. „Зајакнување на жените и девојките“ е еден од столбовите на таа агенда.
Горенаведените реформи првенствено се фокусираат на платите, како на активна должност, така и во резерви, а се планира да се подобри и поддршката за грижата за децата и старите и болните членови на семејството.
Владата се надева дека тоа ќе ги охрабри жените да не се одлучат за неплатена работа во домот, каде сè уште го носат најголемиот товар, туку да се вработат - дури и во војска.
Такви напори веќе постојат на друго место, во јавниот и приватниот сектор. Некои политички партии, на пример, бараат соодносот на мажите и жените да биде половина и пол кога станува збор за кандидати за лидерски позиции. Бундестагот веќе донесе некои од потребните закони.
Кога во 1955 година беше основана војската на Западна Германија, на жените им беше забрането да служат војска. Така беше до 1975 година, кога на жените им беше дозволено да се приклучат на војската, но само во медицинскиот кор. Дури и во 2001 година, откако сите воени улоги беа отворени за жените, медицинскиот кор остана област со најголем женски контингент.
Во социјалистичка Источна Германија, приказната беше поинаква. Нејзините вооружени сили беа основани во 1956 година и дозволија учество на жените во сите гранки на војската. Но, мажите беа регрутирани, додека жените служеа доброволно. А таму најмногу се занимаваа со медицински и административни работи.
Германија не е единствената со малку жени војници. Во повеќето земји, вклучувајќи ги и нејзините најблиски сојузници, војската е „сè уште машки свет“, се вели во извештајот на британскиот парламент од 2021. Во тоа време, процентот на жени во британската војска бил 11 проценти. Тоа беше највисоко ниво на сите времиња, според Министерството за одбрана во Лондон, но целта од 15 проценти сè уште не беше исполнета. Таа цел сега е зголемена на 30 проценти до 2030 година
Во САД во истата 2021 година, жените сочинуваа повеќе од 17 проценти од активниот персонал, според американското Министерство за одбрана. Тоа е нагорен тренд.
Претседателот Џо Бајден неодамна ја назначи Лиза Франчети за командант на морнарицата. Доколку назначувањето биде потврдено од Конгресот, таа ќе стане првата жена во Генералштабот.
Притисокот на Бундесверот за повеќе жени не се однесува само на еднакви можности. Ова е во согласност со сеопфатното подобрување на воените капацитети на Германија. Министерот за одбрана Борис Писториус ја објави целта за регрутирање на уште 20.000 војници до 2031 година.
Нема да биде лесно. Кога станува збор за регрутирање, Бундесверот се натпреварува со другите владини агенции и приватниот сектор за истиот базен на потенцијални кандидати.
Германија, чие население во просек старее, се соочува со недостиг на работна сила, што ја погодува и армијата, изјави за DW портпаролката на Министерството за одбрана.
„Има зголемена побарувачка од работодавачите за квалификуван кадар за сите области“, рече таа.
Армијата има дополнителен проблем: треба да привлече млади луѓе кои сакаат „висок степен на флексибилност и индивидуална слобода во нивниот работен век“, додаде таа. Овие очекувања генерално се во спротивност со ригидната хиерархија и командна структура на војската.
Друг предизвик што војската го споделува со приватниот сектор: безбедноста на работното место, особено за жените. Станува збор за сексуално вознемирување: според податоците на невладината организација Terre des hommes, во Бундесверот од 2018 до 2020 година имало речиси 850 такви случаи.
