Поранешниот долгогодишен репрезентативец Гоце Седлоски е нов предводник на клубот од Дебар Маало, објави денеска Работнички.
Работнички цели две недели беше без тренер откако спогодбено се раздели со Милан Илиевски ден по убедливиот пораз 3:0 од Шкупи. Иако првично требаше наредните денови да назначат нов тренер, сепак тоа се случи дури сега.
Гоце Седлоски беше без ангажман од јули кога си замина од албанска Влазнија, каде беше само три месеци. Работнички ќе биде третиот домашен клуб во неговата кариера откако претходно во два наврата го предводеше Шкупи, со кого ја освои титулата во 1.МФЛ во сезоната 2021/2022, со Вардар освои две последователни титули во сезоните 2015/2016 и 2016/2017, претходно беше спортски директор на клубот, а во тренерските почетоци го водеше и Хоризонт од Турново.
Освен Влазнија, Седлоски надвор од државава ги водеше вториот тим на загрепски Динамо, Широки Бријег, латвиска Рига, а занаетот го учеше како асистент тренер во Матерсбург, клубот каде што и ја заврши богатата кариера во 2011 година.
Штета што Седлоски седнува на клупата на Работнички по елиминацијата на клубот од Купот на Македонија минатиот четврток од Шкупи. Се чини Купот беше единствена шанса за излез во Европа наредното лето, со оглед на бодовното заостанување од 9 бодови до второто место.
Инаку, Гоце Седлоски долги години беше репрезентативец на Македонија играјќи точно 100 натпревари. Нерговата позиција беше централен бек. Кариерата ја почна прилепска Победа, играше и за сплитски хајдук, Шефилд Веднсдеј во Премиер лигата, загрепски Динамо, јапонска Вегалта Сендаи, турски Дијарбакирспор и австриски Матерсбург.