Голема експлозија одекна денеска во хотелот Saratoga во Хавана, главниот град на Куба.
Експлозијата уништила неколку хотелски ката, како и автомобили и автобуси кои се наоѓале во близина. Сведоци за локалните кубански медиуми изјавија дека експлозијата звучела како бомба, а се случила во 11 часот по кубанско време.
Хотелот се наоѓа во близина на кубанскиот Капитол, седиштето на парламентот. Saratoga е еден од најлуксузните хотели во Хавана, изграден во 1880 година, а реновиран и претворен во хотел во 1933. Има 96 соби, два бара, два ресторана, спа и теретана. Се наоѓа во историскиот центар на градот.
Засега причината за експлозијата е непозната, а кубанскиот претседател Мигел Дијас-Канел изјави дека експлозијата не била предизвикана од бомба. Досега потврдени се најмалку 8 загинати и 30-ина повредени. Хотелот бил речиси празен бидејќи поради пандемијата бројот на туристи во Куба е драстично намален.
„Според првичните наоди, се повикуваме на верзијата дека експлозијата била предизвикана од истекување на гас“, јави кубанското претседателство на Twitter.