Неверојатна сцена се случи синоќа во Италија каде голманот на Модена, Рикардо Гањо, му донесе голема победа на својот тим со гол во надополнувањето.
Гол на голман не е нешто што не го гледаме во светот на фудбалот, иако тие се доста ретки. Сепак, она што го видовме синоќа во Модена е вистинска бајка.
Тимот се доближи до пласман во Серија Би благодарение на чудесниот гол на голманот Рикардо Гањо во последните секунди од натпреварот. Чуварот на мрежата донесе победа од 2:1 над тимот на Имолезе.
Гањо сакаше да ја исфрли топката од својот гол што поблиску до противничката петерец за неговите соиграчи да имаат шанса за гол за важна победа.
Сепак, топката незгодно се одби и го измами неговиот колега од спротивната страна, кој за волја на вистината и не реагираше баш најдобро, па топката заврши во мрежата.
Тоа донесе ерупција од ентузијазам на стадионот „Алберто Браља“ во Модена, каде домаќинот наскоро ќе го прослави пласманот во Серија Би.
Модена сега има 4 бода повеќе од второпласираната Реџана, а до крајот остануваат само две кола. Јасно е дека овој гол на голманот речиси ќе однесе тимот во повисок ранг.
