Премиерот Зоран Заев имаше онлајн-средба со Един Бајрами, претседател на Здружението на Горанците во Македонија и со претставници на здружението, на која, како што информира владината Прес-служба, се поздравени политиките на премиерот Заев и на Владата за концептот „Едно општество за сите граѓани“.
– Претседателот и членовите на Здружението на Горанците, за кое е соопштено дека е формирано пред две години во нашата држава, информираа дека имаат претставници од Горанците во нашата земја, но и од Косово и од Албанија, и изразија определба за активен придонес во реформските процеси во државата. Тие информираа дека како луѓе од еснафот, главно угостители и занаетчии, во време на пандемијата имаат организирано хуманитарни активности со поделба на оброци за припадници на МВР, на мигранти и на деца без родители и дека ќе продолжат да дејствуваат во оваа хумана насока, соопшти владината служба за информирање.
Исто така, на средбата беа истакнати и неколку културно-уметнички проекти, на чиишто подготовки веќе работи здружението.
– Горанците се одговорни и лојални граѓани на нашата држава и треба да бидат поддржани во изразениот интерес да придонесат во политиките и активностите за доброто на државата, рече премиерот Заев.
На средбата е договорено во следниот период да се работи на поголема вклученост на Горанците во општествено-политичкиот живот во земјава, како и за поддршка на посочените проекти од областа на културата.
– Исто така, разговарано е и за можноста за посета на областа Гора во Косово, каде, како што е соопштено, има изразен интерес од населението за средба со премиерот Зоран Заев, информира владината прес-служба.
Во областа Гора распослани се девет села, населени со Македонци со муслиманска вероисповед, познати под името Горанци, а нив ги има и во други делови на Косово. Партијата „Единствена горанска партија“ ги претставува во косовската политика, додека најпознат Горанец е поранешниот југословенски фудбалски репрезентативец Фахрудин Јусуфи кој почина минатото лето.
