Грчките хотелиери бараат од Министерството за туризам во земјата да ги разјаснат деталите околу задолжителната примена на здравствените протоколи за работа.
„Хотелите не се и нема да станат болници“, децидна е Грчката комора на хотелиери во писмото до министерот за туризам Хари Теохарис, нагласувајќи дека барањата поставени пред сопствениците и операторите на хотели не само што се скапи, туку и се далеку над нивните средства и одговорности.
„Тоа не е работа на хотелиерите и не би требало да биде од повеќе од десетина причини, како идентификување, испитување и лечење на туристи со коронавирус. Тоа треба да биде работа на јавните здравствени служби“, стои во писмото.
Тие додаваат дека мерките на претпазливост кои се бараат од хотелите не се применуваат во целиот спектар на работењето, алудирајќи на двојните стандарди во поглед на конференциските настани и затворените базени.
