Во срцето на Лима, главниот град на Перу, ископана е гробница од времето на Инките, велат археолозите за локацијата под работничката куќа за која се верува дека содржи останки од тела на благородници, завиткани во ткаенина, заедно со керамика и орнаменти.
Главниот археолог Хулио Абанто изјави за Reuters дека гробницата стара 500 години содржи неколку тела завиткани во ткаенина.
Тоа е метод со кој тамошните народи ги закопувале своите мртви, цврсто завиткувајќи ги нивните тела до кои ставале предмети.
Абанто рече дека погребаните веројатно биле членови на елита од општеството Ририканчо, култура што некогаш ја населувала денешна Лима пред моќните Инки да владеат со големата империја во Јужна Америка во 15 век.
Познати по нивното злато и софистицирани конструкции, меѓу нив и кралското засолниште на Мачу Пикчу на врвот на планината, Инките биле освоени од шпанските освојувачи во 1532 година.
Иполито Тика, сопственик на куќа во Лима, рече дека бил преплавен со чувства поради ова ненадејно откритие.
„Тоа е неверојатно. Навистина немам други зборови да го опишам“, рече тој, изразувајќи надеж дека идните генерации во работничката населба Сан Хуан де Луриганчо подобро ќе ја ценат богатата историја околу нив.
Ископувањата започнаа минатиот месец, откако плановите на Тица за реновирање на имотот доведоа до задолжително археолошко истражување во областа Лима, позната по стотиците археолошки наоди од културите што се развиле пред и по Инките.