Во тензичен натпревар Аргентина го победи Бразил со 1:0 на гостински терен и го турна на 6. место во квалификациите за Мундијалот 2026.
Средбата од шестото коло од јужноамериканските квалификации се одигра на иконската „Маракана“, а почетокот на натпреварот доцнеше половина час поради нередите кои избија на трибините. Така, наместо да почне во 1:30 часот ноќеска по македонско време, почна околу 2, па само наупорните останаа да го гледаат ова големо дерби.
Навивачите на Аргентина и бразилската полиција се судрија на трибините, а во тоа се вмеша и голманот на Аргентина, Еми Мартинес, со намера да спречи еден полицаец да ги удира навивачите и успеа во намерата.
Потоа, капитенот на Аргентина, Лионел Меси, во знак на протест ги одведе соиграчите во соблекувалната и светските шампиони не сакаа да играат додека не се гарантира безбедноста на нивните навивачи.
Играчот на Реал Мадрид, Родриго, ги нарече Аргентинците „кукавици“, по што следеше брутален одговор од далеку поискусниот Меси.
„Ние сме светски шампиони, зошто сме кукавици? Молчи“, одговорил најдобриот фудбалер на сите времиња, пренесува TyC Sports.
Во заштита на Меси дојде Родриго де Паул, а потоа интервенираа и други фудбалери кои се погрижија конфликтот да не ескалира.
Тензиите од трибините се префрлија на тревникот, а првото полувреме помина во антифудбал и бројни груби фаули, а веќе во воведните минути од натпреварот Габриел Жезус со лакт го удри по главата Родриго де Паул.
Најдобрата шанса за гол ја имаше Бразил во 58. минута кога Жезус одлично го проигра соиграчот од Арсенал, Габриел Мартинели, кој шутираше од волеј, но Мартинес одлично интервенираше и го спаси својот гол.
Само пет минути подоцна Аргентина го постигна голот кој ѝ ја донесе победата.
Џовани Ло Селсо изведе корнер од левата страна, Николас Отаменди се издигна над Габриел Магаљајс и го матираше Алисон Бекер за огромно славје на Аргентинците.
Бразилците го дочекаа крајот на натпреварот со десетмина, откако Жоелинтон доби директен црвен картон поради прекршок.
Аргентина е лидер во јужноамериканските квалификации, додека Бразил со третиот последователен пораз падна на шестото место.
Табела: