Првиот вице-премиер, Артан Груби од ДУИ, ги негираше шпекулациите дека има амбиции да стане првиот македонски премиер кој е етнички Албанец.
Во гостувањето на емисијата „Само интервју“ на Канал 5 во четвртокот, Груби одговори на прашањето дали можеби тој ќе биде прв премиер Албанец, со оглед на договорот кој неговата партија го има со СДСМ уште од времето кога Зоран Заев беше премиер, за 100 дена премиер Албанец.
„Тоа не ми е предизвикот, најискрено, сметам дека друг човек треба да биде прв Албанец на чело на Владата, заради политички момент, заради политичка порака, заради целосно помирување на општеството, заради надминување на сите предрасуди. Но, ќе го сочувам мојот фаворит за подоцна“, рече Груби.
Тој потврди дека договорот ДУИ-СДСМ за 100 дена Албанец премиер важи и покрај смената на Заев со Димитар Ковачевски. Воедно, рече и дека тоа ќе биде направено само за да се скршат табуата.
„За да се скршат табуата, не поради друго. Тој премиер Албанец нема да направи чуда, или таа Албанка којашто ќе води 100 дена влада во нашата земја. За да се скршат табуата, како што се скршија со Талат Џафери на чело на Собранието, дека ништо не ѝ се случи на Република Северна Македонија, напротив, стана посилно општество. Истото ќе се случи и со прв Албанец премиер, за апсолутно да се надминат сите предрасуди и да се види дека и Албанец премиер ќе се залага исто како Ковачевски, или како Заев или како било кој друг премиер на нашата земја“.
