Шведскиот фудбалер со балканско потекло Златан Ибрахимовиќ (39) на социјалните мрежи објави видео старо 20 години, во кое тогашниот соиграч од Малме, Хасе Матисон зборува за него.
Иако е тешко да се каже точно кога е направена снимката од соблекувалната, јасно е дека датира од периодот кога Ибрахимовиќ играше за првиот тим на шведскиот клуб помеѓу 1999 и 2001 година.
„Златан не е проблем, ама има арогантен став и мораме да го прифатиме тоа до одреден степен. Сепак, почна да разбира дека мора да биде дел од тимот. Тој сè уште не е ѕвезда, иако смета дека е. Тоа можам да го разберам, бидејќи медиумите и навивачите многу го величаат. Ако жонглира покрај корнер знаменцето, одеднаш е новиот Марадона. И ние, другите, знаеме како да жонглираме покрај корнер знаменцето“, вели Матисон во видеото.
Ибра во опис на објавеното видео напиша „Наспроти сите прогнози“, што според многумина е уште една провокација за Швеѓаните, но и еден вид мотивација за фудбалерот кој навистина надмина многу прогнози во врска со текот на неговата кариера.
Матисон помина десет години во Малме, но не направи некоја позначајна меѓународна кариера, исто како и другите соиграчи, додека Ибрахимовиќ стана еден од најдобрите напаѓачи во неговата ера што трае и понатаму.
