Утрешната фудбалска класика на „Енфилд“ ќе остане посиромашна за еден великан откако Златан Ибрахимовиќ поради повреда не отпатува за Островот.
Фудбалерите на Милан денеска со чартер лет отпатуваа за Ливерпул, но на авионот не се качи ветеранот Златан Ибрахимовиќ. Поради повреда на Ахиловата тетива, тој нема да може да го збогати овој натпревар.
Златан викендов му се врати на фудбалот по повредата поради која го прошушти и Европското првенство, и тоа го направи во својот препознатлив стил со гол и победа.
„Натпреварот Милан - Лацио го заврши со воспаление на тетивата, денеска тренираше, но нема да ризикувам“, објасни денес тренерот Стефано Пиоли.
„Златан ќе го почнеше натпреварот. Но, таквото воспаление е честа појава после четири месеци неиграње. Се надевам дека ќе продолжи да игра, се обиде на тренинг, но имаше болки. Нема потреба да ризикуваме, ќе има уште многу натпревари после утрешниот“, додава Пиоли.
Ливерпул и Милан играат утревечер од 21:00 часот, а директен пренос ќе врши МРТ1.
