Скопје, 24 ноември 2021 (МИА) – Намалување од 8,9 отсто на бројот на новозаразени со коронавирус минатата седмица во споредба со претходната, бележи Институтот за јавно здравје (ИЈЗ) во неделниот извештај за состојбата со COVID-19 во земјава.
Од 15 до 21 ноември од COVID-19 заболеле 2.929 лица, што е за 288 помалку од периодот меѓу 8 и 14 ноември.
Минатата недела се тестирани се 19.791 лица, за 7,3 отсто помалку од претходната седмица. Процентот на позитивност се движи од 11,6 до 16,9 отсто, а просечно 14,8.
Најмногу новозаразени има во Скопје. Регистрирани се заболени лица во сите возрасни групи, а најзастапени се лицата над 60 години (23,3%). Најмалку заболени се регистрирани кај возрасната група од 0-9 години (3,6%).
Се забележува намалување на бројот на заболени кај сите возрасни групи, освен кај возрасната група од 0-9 години (+2,0%). Најзабележително е намалувањето кај возрасната група на лица над 60 години (-13,7%)
Според полот, 54,3 отсто од заболените се женски, а 45,7 машки лица.
Кај сите секвенционирани примероци е докажана делта варијантата, како и присуство на различни нејзини сублинии. Сублинијата позната како делта плус не е детектирана кај ниту еден од секвенционираните примероци.
Пријавени се 91 смртен случај, најмногу од возрасната група над 60 години (89%).
Активни на COVID-19 се 8.290 лица, хоспитализирани се 495, од кои 330 се на кислородна поддршка и 14 на инвазивна/неинвазивна механичка вентилација.
Минатата недела се евидентирани и 2.855 оздравени лица.
ИЈЗ регистрирал и 49 реинфекции. Заклучно со 21 ноември вкупно се пријавени 870 реинфекции, што е 0,4 отсто од вкупниот број на досега заразени кој изнесува 212.375 лица.
