Добро познатиот сајт DxOMark го тестираше квалитетот на камерата на iPhone 14 Pro, а најновиот телефон на Apple постигна завиден резултат.
На почетокот на септември Apple ја претстави својата нова серија на iPhone уреди. За жал, iPhone 14 не донесе речиси ништо ново, но тоа не е случај со моделите iPhone 14 Pro. Покрај отстранувањето на засекот, воведувањето на системот Dynamic Island и новиот чипсет А16, еден од најголемите новитети е всушност подобрениот хардвер на камерата, бидејќи компанијата го зголеми бројот на мегапиксели за првпат по моделот iPhone 6S - од 12 до 48.
Како што обично се случува по лансирањето на новите уреди, целиот свет чекаше прегледи за овие паметни телефони, но оние кои беа заинтересирани за квалитетот на камерата знаеја дека треба да ги чекаат DxOMark, лабораторијата за проценка на квалитетот која ги обезбедува резултатите од научните тестови на леќи и фотоапарати веќе 15 години.
На нивниот тест неодамна учествуваше и iPhone 14 Pro, а камерите на овој уред импресионираа, постигнувајќи вкупен резултат од 146 поени, што е втор најдобар резултат на глобалната листа на паметни телефони. Првото место, со вкупен резултат од 147 поени, го држи Honor Magic4 Ultimate.
Иако iPhone 14 Pro не успеа да ја добие титулата за телефон со најдобра камера, се најде на првото место кога станува збор за видеоперформансите и селфи камерата.
Како што наведуваат на веб-страницата DxOMark, фотографиите со предната камера обезбедуваат одличен динамички опсег, експозиција, како и ефектот bokeh. Полни се со детали, а тоновите на кожата се прецизни - освен во најсложените услови.
Кога станува збор за квалитетот на видеоснимките, новиот iPhone, како и неговиот претходник, продолжува да доминира на ова поле. Покрај квалитетот на сликата, DxOMark ја пофали и стабилизацијата, додавајќи дека и автофокусот е сигурен и прецизен.
Иако постигна одличен резултат, iPhone 14 Pro, исто како и iPhone 14 Pro Max, немаше беспрекорно лансирање, но корисниците масовно известуваа дека имаат проблем со тресење и зуење на камерата. За среќа, Apple брзо реагираше и го реши овој проблем со ажурирањето на iOS 16.0.2.
