Еден крак од гасоводот „Северен поток 1“ е уништен во должина од околу 250 метри при експлозија кон крајот на септември, соопшти денес операторот.
Според прелиминарните резултати од истрагата, има два кратери на морското дно, секој длабок од 3 до 5 метри, соопшти компанијата Nord Stream AG.
Тие се наоѓаат на околу 248 метри оддалеченост еден од друг.
„Делот на цевката меѓу кратерите е уништен, радиусот на дисперзија на фрагменти од цевката е најмалку 250 метри“, соопшти компанијата.
На крајот на септември беа откриени четири истекувања во гасоводите Северен поток 1 и 2 по експлозиите во близина на островот Борнхолм во Балтичко Море, по две во данската и шведската ексклузивна економска зона.
ЕУ и НАТО, меѓу другите, претпоставуваат дека се работи за саботажа.
Двата гасоводи минуваат од Русија до североисточна Германија. Работењето на гасоводите стана многу чувствителна политичка тема со почетокот на руската инвазија на Украина на крајот од февруари.
