Најстрашните прогнози се остварија откако денеска на Доменико Берарди му беа направени прегледи по синоќешната повреда.
Напаѓачот на Сасуоло се повреди синоќа во поразот од 1:0 кој неговиот тим го претрпе на гостувањето во Верона. По 60 минути игра, мораше да го напушти теренот откако обидувајќи се да смири на гради една топка, лошо згазна и сам се повреди.
„Инструменталните прегледи извршени врз Доменико Берарди покажаа целосно кинење на Ахиловата тетива на десната нога“, се вели во соопштението на Сасуоло, во кое се додава дека операција ќе му биде направена во вторник во Болоња, а ќе го оперира д-р Стефано Ѕафањини.
Несреќниот Берарди штотуку се врати од мускулна повреда поради која ги пропушти претходните 6 натпревари.
Ова значи дека сезоната за голгетерот дефинитивно е завршена, а ќе го прошути и ЕУРО 2024. Берарди беше дел од репрезентацијата на Италија која пред три години стана европски шампион. Всушност, тој беше и еден од успешните изведувачи во пенал-серијата во финалето против Англија на „Вембли“.
Повредата на Берарди е на 2:05:
Берарди сезонава на 17 натпревари во Серија А постигна 9 голови и асистираше на 3.
Прогнозите велат дека на зелениот терен ќе се врати дури во октомври.
Повредата на 29-годишниот фудбалер не е само лоша вест за селекторот Лучано Спалети, туку и за неговиот Сасуоло, кој ја игра најлошата сезона од влегувањето во Серија А во 2013 година. „Неровердите“ со 20 бодови се на претпоследното место на табелата и се во серија од 4 порази по ред, или 8 без победа.
