Италија ги заостри мерките за спречување на порастот на инфекциите со COVID-19, вклучително и забрана за сите новогодишни прослави бидејќи дневните инфекции достигнуваат рекордно ниво, соопшти италијанската влада.
Министерот за здравство Роберто Сперанца рече дека носењето маски повторно ќе биде задолжително надвор и им нареди на граѓаните да користат маски FFP2 во јавниот превоз и на јавни места, како што се театри, кина и спортски настани, бидејќи тие обезбедуваат поголема заштита.
Покрај тоа, концертите и настаните на отворено ќе бидат забранети до 31 јануари, а дискотеките и клубовите ќе мора да ги затворат вратите до тој датум за да спречат масовни собири за време на празничната сезона.
Новите мерки беа објавени на денот кога Италија забележа 44.595 нови случаи на COVID-19, што е зголемување за повеќе од 70% за само една недела, бидејќи заразната варијанта oмикрон почнува да се шири низ целата земја.
Имаше и повеќе смртни случаи, 168 вчера, што е најголем број од мај, но под нивоата на претходните пикови, најмногу поради големиот број вакцинирани лица.