Заштитните маски ќе бидат задолжителни во Италија во јавниот транспорт и на некои настани во затворени простории до 15 јуни, изјави денеска министерот за здравство Роберто Сперанза.
„Маските ќе бидат задолжителни во кината, театрите и другите настани во затворен простор, како и во болниците“, рече Сперанза. Владата ќе биде внимателна во укинувањето на мерките.
„Одлучивме дека овие мерки важат најмалку до 15 јуни и тој елемент на претпазливост е, верувам, неопходен“, рече Сперанза.
Владата претходно објави дека сертификатите за вакцинација или неодамна прележан коронавирус повеќе нема да бидат потребни за пристап до услужните активности, вклучувајќи ресторани, фитнес центри и јавен превоз од 1 мај.
Италија е првата западна земја погодена од пандемијата и досега има потврдено 163.244 смртни случаи, рангирана на осмото место во светот по смртност.
Инфекциите се во опаѓање во првата половина на април, но италијанскиот тинк-тенк Gimbe вели дека бројот на случаи почнал да расте во последните денови. Околу 84 отсто од Италијанците биле вакцинирани со две дози, а 65 отсто примиле трета.
