Јапонскиот робот ја преживеа „лунарната ноќ“ на Месечината, која трае како две недели на Земјата.
Тоа е период на екстремен студ и целосен мрак, јавува BBC.
„Синоќа испративме команда до #SLIM и добивме одговор“, напиша на X Jaxa (Јапонската национална агенција за вселенски истражувања).
За време на незгодното слетување минатиот месец, соларните панели на лендерот беа свртени на погрешна страна, спречувајќи го да генерира енергија. Ставен е во режим на мирување. Промената на правецот на сончевите зраци му овозможи да испрати некои слики подоцна, но повторно се исклучи кога падна лунарната ноќ. Jaxa објави дека SLIM (Smart Lander for Investigating Moon, прев. Анг. Паметен лендер за истражување на Месечината) не е дизајниран за суровите лунарни ноќи. Тие напишаа дека во средината на февруари, кога Сонцето повторно ќе засвети на соларните панели, тие ќе продолжат со мисијата.
„Веста дека SLIM се рестартира по студената лунарна ноќ е значајна“, рече д-р Симеон Барбер. „Преживувањето на лунарната ноќ ќе биде еден од клучните технолошки предизвици со кои ќе се соочиме ако сакаме да започнеме долгорочна мисија на Месечината.“
Д-р Барбер објасни дека SLIM слета во близина на екваторот на Месечината, каде што температурата на земјата достигнува над 100 степени Целзиусови напладне, но паѓа на -130 Целзиусови степени навечер.
Jaxa извести дека комуникацијата со роботот брзо била прекината, во времето кога на Месечината било среде денот, што значи дека температурата на комуникациската опрема била многу висока. Велат дека чекале да се изладат инструментите, при што се подготвиле да ја продолжат операцијата.
За време на периодот на „будење“, SLIM испрати нови слики на Земјата. Во Jaxa се надеваат дека откако ја преживеал лунарната ноќ, ќе може нормално да продолжи со работата.
Лендерот не само што е буден, туку и продолжува да собира научни податоци. Новите снимки од мисијата на објавени на профил на мисијата на јапонски јазик покажуваат нова зона на Месечината „која не беше видлива минатиот пат“, се вели во објавата на платформата X преведена од јапонски јазик со помош на Google Translate, пишува Space.com. Сликите се направени со помош на навигациската камера на мисијата, напишаа претставниците на SLIM во друга објава, иако тимот планира повторно да воспостави контакт само кога локалните температури ќе паднат на побезбедни нивоа.
По слетувањето минатиот месец, Jaxa стана петтата национална вселенска агенција која безбедно слета вселенско летало на Месечината, по САД, поранешниот СССР, Кина и Индија.
Минатата недела американското вселенско летало Odysseus стана првото приватно роботизирано вселенско летало кое успешно слета на Месечината.
Како SLIM, и тоа слета незгодно. Компанијата Intuitive Machines, која управува со вселенското летало, верува дека роботот се превртел на страна за време на слетувањето. Odysseus сè уште работи и комуницира со центарот на Земјата. Сè уште нема објавени снимки од експедицијата.